امریکی تاریخ کی شدید ترین سردی، ریاست مشی گن کی جھیل برف کی موٹی تہہ میں تبدیل

امریکا اس وقت سخت سرد موسم کی لپیٹ میں ہے جہاں آرکٹک ہواؤں کی یلغار کے باعث مشی گن جھیل غیر معمولی طور پر جم گئی ہے۔ یہ جھیل شمالی امریکا کی پانچ بڑی جھیلوں میں شمار ہوتی ہے اور امریکی تاریخ میں یہ صرف چند ہی بار اس حد تک منجمد ہوئی ہے۔

مسلسل شدید سردی کے باعث جھیل کی سطح پر برف کی موٹی تہہ جم چکی ہے۔ اگرچہ سرد موسم میں جھیل کے کچھ حصوں کا منجمد ہونا معمول کی بات سمجھی جاتی ہے، لیکن پوری جھیل یا اس کے بڑے حصے کا برف میں تبدیل ہونا عالمی موسمیاتی ریکارڈ کے مطابق ایک نایاب واقعہ ہے۔

اس سرد لہر کے اثرات صرف مشی گن جھیل تک محدود نہیں رہے، بلکہ ایری جھیل سمیت امریکا کی دیگر بڑی جھیلیں بھی برف سے ڈھک گئی ہیں۔

ماضی میں بھی سخت سردیوں کے دوران مشی گن جھیل پر برف جمی ہے، جن میں 1976، 1979 اور 1994 قابلِ ذکر سال ہیں، تاہم اس بار جھیل کے بڑے حصے کا اس شدت سے منجمد ہونا ایک غیر معمولی منظر پیش کر رہا ہے۔

ماہرین موسمیات کے مطابق بدلتے موسمی حالات اور غیر متوقع سرد ہوائیں اس خطے میں شدید موسمی اتار چڑھاؤ کا باعث بن رہی ہیں، جس کے نتیجے میں کبھی ریکارڈ سطح کی برفباری دیکھنے میں آتی ہے اور کبھی موسم غیر معمولی حد تک گرم ہو جاتا ہے۔